Цените на нафтата пораснаа во четвртокот по падот на претходните две сесии, бидејќи загриженоста за снабдувањето повторно се појави откако американскиот претседател Доналд Трамп објави дека ја укинува лиценцата дадена на Шеврон за работа во Венецуела.
Фјучерсите на суровата нафта „брент“ поскапеа за два центи на 72,55 долари за барел. Цените на фјучерсите на американската „Вест Тексас интермедит“ се зголемија за шест центи на 68,68 долари за барел.
Еден ден претходно, договорите беа на најниско ниво од 10 декември поради изненадувачкиот пораст на залихите на гориво во САД што сигнализираше слабеење на побарувачката и надежи за можен мировен договор меѓу Русија и Украина. Двата одредници паднаа за околу пет проценти досега овој месец.
Трамп вчера изјави дека ја одзема лиценцата што му ја даде на Шеврон од неговиот претходник Џо Бајден пред повеќе од две години да работи во Венецуела. Шеврон дневно извезува околу 240.000 барели сурова нафта од Венецуела, што е повеќе од една четвртина од вкупното производство на нафта во земјата. Одземањето на лиценцата значи дека Шеврон повеќе нема да може да извезува венецуелска сурова нафта.
Минатата недела Трамп рече дека неговата администрација брзо ќе ги надополни стратешките нафтени резерви, а експертите веруваат дека тоа влијае и на пазарот. Тој, исто така, го критикуваше Бајден за користење на стратешката нафтена резерва за намалување на цената на бензинот.
Учесниците на пазарот остануваат фокусирани на мировните преговори на Трамп меѓу Русија и Украина. Трамп рече дека Володимир Зеленски ќе го посети Вашингтон во петок за да потпише договор за ретки минерали, додека украинскиот лидер рече дека успехот на преговорите ќе зависи од тие разговори и од континуираната помош на САД.
Залихите на сурова нафта во САД неочекувано паднаа минатата недела, бидејќи активноста на рафинирање се зголеми, додека залихите на бензин и дестилати се зголемија изненадувачки, соопшти вчера Управата за енергетски информации.