Одлуката на Европската Унија да го одложи воведувањето на новиот систем за наплата на емисиите на јаглерод (ETS2) би можела да влијае на намалувањето на инфлацијата во наредните години и со тоа повторно да го отвори прашањето за нови намалувања на каматните стапки во Еврозоната.
ETS2 беше замислен како дел од Зелениот план на ЕУ и требаше да воведе дополнителни трошоци од 2027 година за загадувачите, вклучувајќи ги фирмите во секторите за транспорт и греење на згради, што индиректно би ги зголемило цените на горивото и енергијата за граѓаните, објавува Блумберг.
Сепак, за да го ублажат економското влијание на зелената транзиција, владите и пратениците на ЕУ сакаат да го одложат спроведувањето на системот, што би значело дека цените за потрошувачите би растеле побавно отколку што сега се предвидува. Таа одлука би можела да доведе до повторно паѓање на инфлацијата под целта од два проценти на Европската централна банка (ЕЦБ) во 2027 година, отворајќи ја вратата за понатамошно олабавување на монетарната политика.
„Доколку ETS2 не стапи во сила во 2027 година, падот на инфлацијата би можел да биде уште поизразен, што би бил аргумент за уште едно намалување на стапката“, рече Руне Јохансен, економист во Банката на Данска, додавајќи дека некои претставници на ЕЦБ сепак би се спротивставиле на овој потег.
Според најновата проекција на ЕЦБ, инфлацијата треба да биде 1,7 проценти во 2026 година и 1,9 проценти во 2027 година. Аналитичарите од „Блумберг економикс“ проценуваат дека само ЕТС2 би додал најмалку 0,2 проценти на инфлацијата во 2027 година, што значи дека без него цените би растеле уште побавно.
Економистите од „Џеј Пи Морган“ веруваат дека ефектот од ЕТС2, кој првично беше концентриран во 2027 година, сега веројатно ќе биде „растегнат“ и делумно поместен во 2028 година, што уште повеќе би ги намалило инфлациските притисоци. Одложувањето на системот ЕТС2 дополнително ја комплицира работата за ЕЦБ, која веќе се соочува со неизвесности како што се царините на Трамп, војната во Украина, а сега и сè повидливиот пад на политичката волја за спроведување на Зелениот план на ЕУ.
Иако ЕУ останува формално посветена на намалување на емисиите до 2040 година, многу влади сега даваат приоритет на растот и зајакнувањето на одбранбените капацитети, плашејќи се дека повисоките трошоци за енергија би можеле да предизвикаат бунт кај гласачите.
Претседателката на ЕЦБ, Кристин Лагард, неодамна се обиде да ги смири пазарите, велејќи дека системот сè уште би можел да започне во 2027 година, но постепено. Сепак, Европскиот совет и Парламентот сега официјално бараат одложување, за кое ќе се преговара со Европската комисија во наредните недели.