Во рамки на 10-тото советување на МАКО СИГРЕ, Кончар – Инженеринг за енергетика и транспорт (КЕТ) од Загреб и Факултетот за електротехника и информациски технологии (ФЕИТ) од Скопје потпишаа договор за соработка и донација на SCADA систем PROZA NET за Центарот за трансфер на технологии и иновации (ИННОФЕИТ). Договорот го потпишаа претседателот на Управата на КЕТ, Мишо Јурковиќ и Деканот на ФЕИТ, проф. д-р Димитар Ташковски, стои во соопштението. Соработката, покрај другото, опфаќа реализација на научно – истражувачки и развојни проекти, користење меѓусебни стручни знаења на стручните лица, опрема и лаборатории.
КЕТ, во оваа прилика, го врачи SCADA системот PROZA NET, којшто ќе се користи во новиот центар на ФЕИТ. Со цел да зајакне соработката меѓу универзитетите и индустријата, ФЕИТ го покрена ИННОФЕИТ, со цел своите студенти подобро да ги подготви за работа во индустријата. ИННОФЕИТ ќе биде средиште за интеракција помеѓу професорите и студентите на ФЕИТ со партнерите од индустријата, кои ќе ја поттикнуваат врската и преносот на технологиите, како и новите иновативни идеи, со што ќе помогнат во економскиот раст на индустријата и општеството во целина.
PROZA NET SCADA системот претставува повеќекориснички дистрибуиран програмски систем за надзор и управување со објектите и постројките во енергетските системи. Модуларната архитектура е во согласност со потребите за висок квалитет и висок степен на интеграција на системите. Основни предности се високата доверливост, флексибилност и скалабилност. Може да се користи за различни нивоа на надзор и управување од компјутер во рамки на постројките, до големите централизирани системи во реално време. Со системот е можно да се управува со постројки на подрачјето на електроенергетиката, со индустријата на гас и нафта, транспорт и водостопанство. PROZA NET SCADA системот е развиен во потполност како резултат на знаењето и искуството на КЕТ. Модуларноста и отвореноста на системот овозможува многу повеќе од класичните SCADA системи и со право може да го карактеризираме како интеграциска платформа која е основа на современите системи за далечински надзор и управување во подрачјето на енергетиката.
“Овој проект е потврда на веќе традиционалната соработка на Кончар со високообразовните институции. Се надеваме дека резултатите на заедничкото делување на овој план ќе доведат до унапредување на соработката на научните институции и субјектите од стопанството, но и поврзување со стручниот кадар во Македонија каде Кончар е традиционално присутен“, изјави Мишо Јурковиќ, претседател на Управата на КЕТ.
“Науката и иновациите се клучни за развој на економијата. ФЕИТ, како еден од лидерите на подрачјето на научната дејност во Македонија, сноси голема одговорност во тој дел. Затоа, Факултетот со помош на Универзитетот и партнерските фирми инвестира во ИННОФЕИТ, центар од којшто научно-истражувачките резултати ќе треба да се пренесат на националното стопанство. КОНЧАР е втората реномирана меѓународна фирма која ја потпомага оваа идеја. Ја користам оваа прилика да се заблагодарам на КОНЧАР за оваа донација и очекувам интензивирање на соработката во иднина“, истакна проф. д-р Димитар Ташковски, Декан на ФЕИТ.
