Според најновиот извештај на Народната Банка на РМ за монетарни движења во Република Македонија во јануари 2018 година паричната маса во првиот месец од годината бележи месечен пад од 1,2%. Намалувањето главно се објаснува со сезонските движења кај депозитните пари и готовите пари во оптек, коишто само делумно се неутрализирани со умерениот раст кај долгорочните депозити. На годишна основа, паричната маса е зголемена за 5,3% (идентично со стапката на годишен раст од декември минатата година), со најголем придонес во растот на депозитните пари и долгорочните депозити, а во помал дел и на готовите пари во оптек, наспроти намалувањето кај краткорочните депозити.
Кај вкупните депозити, во јануари е регистриран месечен пад од 0,9%, главно под влијание на намалувањето на депозитите на корпоративниот сектор. Споредено на годишна основа, кај депозитите е остварен раст од 5,2% во најголем дел заради растот на депозитите од домаќинствата (71,5% од вкупниот депозитен раст).
Кај кредитите на корпоративниот сектор во јануари забележано е месечно намалување од 3,1%, додека споредено на годишна основа регистриран е раст од 2,9%. Притоа, најголем придонес во месечните и годишните промени имаат кредитите одобрени во денари.
Вкупните депозити на домаќинствата во јануари се намалени за 0,4% на месечна основа, главно под влијание на надолната промена кај депозитните пари, во услови кога краткорочните и долгорочните депозити, и во денари и во странска валута, бележат месечен раст. Споредено на годишна основа, стапката на раст изнесува 5,5%, при што растот е распределен помеѓу денарската и девизната компонента, со поголемо учество во растот на денарските депозити (60,9%).
Во јануари кај вкупните кредити на домаќинствата е регистриран месечен и годишен раст од 0,8% и 9,7%, соодветно, при што зголемената кредитна активност во најголем дел се темели врз денарските пласмани.
Анализирано според намената на кредитите одобрени на физичките лица, кај најзастапената категорија ‒ потрошувачките кредити, стапката на годишен раст во јануари изнесува 11,3%, без промени на месечна основа. Станбените кредити бележат месечен и годишен раст од 1,1% и 15,2%, соодветно. Во првиот месец од годината, автомобилските кредити и кредитите одобрени на кредитни картички забележаа месечен пад од 1,4% и 0,3%, соодветно, при истовремен годишен пад од 1,7% и 0,6%, соодветно. Овој месец кај негативните салда на тековните сметки е остварен месечен и годишен раст од 10,1% и 4,2%, соодветно, додека кај кредитите одобрени врз други основи е регистрирано месечно и годишно намалување од 1,2% и 1,6%, соодветно.
