Кинеската компанија Geely е во напредни преговори за преземање на германскиот производител на летечки такси Volocopter, кој би го спасил стартапот од Баден-Виртемберг од банкрот, пренесува Bloomberg повикувајќи се на анонимни информирани извори.
Geely планира да обезбеди финансирање од 95 милиони долари и за возврат да стекне 85 отсто од акциите во Volocopter, додаде еден од изворите.
Преговорите напредуваат, но сè уште постои можност двете страни да не постигнат договор.
Доколку двете компании се согласат да соработуваат, Volocopter би можел да го пресели производството на своите летечки такси во Кина, каде што регулаторната средина за таканаречените авиони eVTOL е многу поповолна отколку во Европа и САД.
Властите во Пекинг финансиски ги поддржуваат стартапите кои развиваат летечки такси и го сметаат развојот на оваа индустрија за приоритет.
Вредноста на германскиот стартап Volocopter беше проценета на 1,9 милијарди долари во 2022 година, но во меѓувреме таа значително падна и сега изнесува околу 110 милиони долари.
Фото:Facebook
