Фото: Pixabay
Можеби звучи парадоксално, но незадоволниот клиент покрај опасност, претставува и шанса за раст и развој на вашиот бизнис.
Нивното незадоволство ќе ви помогне да ги воочите недостатоците и грешките во вашето работење и ќе ви даде шанса тоа да го поправите.
Кога зборувате со незадоволен клиент, посветете му го целото ваше внимание и бидете искрено заинтересирани за решавање на неговиот проблем, затоа што тоа е и ваш проблем.
Извинете се за непријатноста која настанала, без разлика кој е виновен.
Ставете се на местото на купувачот, кој верувал во вас и уверете го дека навистина ви е важно да го решите настанатиот проблем. Во комуникацијата употребете ги вистинските зборови како “Разбирам зошто сте вознемирени” или “Имате право да се лутите, и јас би постапил/а на истиот начин”.
Потрудете се да му објасните на клиентот зошто дошло до пропуст, ветувајќи дека од сега ќе дадете се од себе грешките да не се повторат. На крајот не заборавајте да предложите начини за брзо и ефикасно решавање на проблемот.
Ако проблемот со незадоволниот купувач го решите на вистинскиот начин, голема е веројатноста дека истиот ќе ви биде лојален повеќе отколку пред настанатиот проблем. Тоа ви дава шанса да имате верни потрошувачи/клиенти на долги патеки.
Токму тоа го потврдуваат и резултатите од едно истражување кое вели дека клиентите имаат многу поголеми шанси да се вратат кај вас доколку признаете дека има проблем и истиот го решите, отколку ако негирате и велите дека сè е во ред.
Можеби вашето настојување да го “измазните“ односот со клиентите нема да резултира со успех, но вашиот став дека сте се потрудиле да го решите проблемот ќе биде забележан како од страната на купецот, така и од страната на вработените и сите останати.
Таквиот став ќе придонесе грешките во иднина да се намалат или целосно да исчезнат, а купувачите/клиентите да бидат задоволни и лојални.
