Американскиот милијардер и сопственик на Тесла, Илон Маск, објави дека компанијата лансирала пробна услуга на „роботски такси“ во главниот град на Тексас, Остин, по цена од 4,20 долари.
Маск на платформата X изјави дека компанијата ќе има врвни безбедносни мерки кога станува збор за овој вид такси услуга. Според него, планирано е оваа услуга да биде достапна само во деловите на Остин кои се сметаат за најбезбедни и кога временските услови се поволни, а „роботските такси“ нема да можат да превезуваат лица под 18 години.
Како што објави Ројтерс, автомобилите Тесла Модел Y можеа да се видат на улиците на Остин во недела, со празно седиште на возачот и патник кој седи на совозачкото седиште. Тесла ги замислува патниците на предните седишта како еден вид „контролор на безбедноста“, иако не е јасно колку контрола би можеле да имаат врз возилото, соопшти агенцијата.
Getting in a Tesla Robotaxi. pic.twitter.com/ibByy7bMg3
— Sawyer Merritt (@SawyerMerritt) June 22, 2025
Тексашките власти подготвија прописи за автономни возила, а републиканскиот гувернер на државата, Грег Абот, потпиша закон во петокот со кој ќе се бара државна дозвола за автомобили без возач. Законот нема да стапи на сила до 1 септември, но неговото потпишување сигнализира дека републиканските и демократските претставници на Тексас сакаат секторот за возила без возач да продолжи претпазливо, според Ројтерс.
Новиот закон го омекнува претходниот став на Тексас за автономните возила, бидејќи регулативата од 2017 година конкретно им забранува на градовите во американската држава да имаат возила без возач.
Законот сега предвидува дека операторите на автономни возила прво мора да добијат одобрение од градските власти. Властите исто така можат да ја одземат лиценцата ако проценат дека возилото без возач претставува опасност за јавноста. Во изминатите неколку дена, компанијата Тесла испрати покани до избрана група онлајн инфлуенсери да тестираат роботски такси во ограничена зона на Остин, пренесува Танјуг.