Централната банка на Турција ја зголеми прогнозата за растот на инфлацијата во земјата за крајот на 2022 година на 42,8%, од претходните 23,2%, т.е. зголемувањето е речиси двојно. Соодветниот извештај денеска го соопшти претседателот на регулаторот Шахап Кавчиоглу, говорејќи на „Информативниот состанок за извештајот за инфлација 2022-II“.
„Прогнозата за инфлација за крајот на 2022 година е ажурирана од 23,2 отсто на 42,8 отсто“, рече тој, цитиран од „Прајм“. Според статистичките податоци, годишната инфлација во земјата во март се забрза на 61,14%.
Минатата година нагло забрза падот на вредноста на националната валута, што негативно се одрази на финансискиот систем на земјата. И годишната инфлација забрза до 36% во услови на флуктуации на курсот на лирата.
Падот на турската лира на 23 ноември минатата година за 18 отсто е највисок во последните 20 години. Доларот на 20 декември достигна рекордни 18,4 лири, во однос на 7,4 во јануари минатата година. Тогаш голем број експерти изразија загриженост дека таквата ситуација може да предизвика нагло зголемување на невработеноста во земјата.
Централната банка на Турција годинава ја одржува основната каматна стапка непроменета на 14 отсто и лирата постепено слабее. На крајот на јануари курсот беше околу 13,5 лири за долар, на крајот на февруари веќе беше 14, на крајот на март – 14,5, додека на крајот на април беше 14,8 лири за долар.
Шефот на регулаторот, набргу откако ја задржа каматната стапка на 14 отсто во март, коментира дека инфлацијата во Турција се очекува да падне до крајот на 2022 година и да се приближи до едноцифрена (под 10 отсто) во 2023 година.
