Холандија е веќе меѓународно позната по одличната велосипедска инфраструктура, а отворањето на нова гаража за велосипеди во Амстердам ја подигнува опсесијата на оваа нација со велосипеди на ново ниво.
Способен да собере до 7.000 велосипеди и изграден по цена од 60 милиони евра (65,3 милиони долари), објектот на централната станица во Амстердам не е најголемата гаража за велосипеди во земјата. Сепак, овој објект има една единствена карактеристика – тој е целосно под вода, пишува Bloomberg.
Гаражата е дел од поширокото реновирање на голема, но исклучително прометна област пред главната железничка станица во градот, Amsterdam Centraal. Овој простор кој се наоѓа веднаш до градското пристаниште е реновиран од 2017 година. Дополнително, просторот над земјата на оваа локација е даден на пешаци и велосипеди.
Големите подземни гаражи за велосипеди на транзитните станици стануваат се почести низ целата земја. Најголемиот, со капацитет од повеќе од 12.000 возила на две тркала, е во Утрехт, четвртиот по големина град во земјата, каде што 51 отсто од инфраструктурата е изменета за да биде погодна за велосипеди. Во Амстердам овој удел е 32 отсто.
