Најголемата директна странска инвестиција во Германија од крајот на Втората светска војна, фабриката за чипови на Интел во Магдебург, вреди дури 17 милијарди евра, а поради зголемените трошоци за енергија и изградба, американската компанија бара од Германците да го зголемат ветениот износот на поддршката, со надеж дека нејзиниот износ ќе се движи најмалку околу 10 милијарди евра.
Но, се чини дека тоа нема да можат да го постигнат доколку истовремено не ја зголемат својата инвестиција и дополнително не ги прошират капацитетите на огромната фабрика, која треба да профункционира во 2028 година, пренесува Јутарњи лист.
Според сегашниот аранжман, Берлин минатата година најави поддршка од 6,8 милијарди евра, што треба да се гледа како дел од Европскиот закон за чипови, кој најавува мобилизација на повеќе од 43 милијарди евра јавни и приватни инвестиции во индустријата за чипови на ЕУ.
Сепак, за тој чин се уште се преговара, како што пишува ФТ, а толку голема финансиска поддршка допрва треба да биде одобрена од Брисел што е во согласност со правилата на ЕУ за државна помош.
Германската фабрика е важен дел од напорите на Интел да се врати во првите редови на глобалната индустрија за чипови, која моментално ја тресат азиските ривали, од кои најголема е тајванската TSMC. Севкупно, за десет години, Интел би можел да инвестира околу 80 милијарди евра во нови фабрички капацитети во Европската унија, што ќе зависи од побарувачката и достапноста на идните субвенции.
Познато е дека американската администрација донесе закон со кој великодушно ги охрабрува производителите на чипови да го зголемат производството во САД, а ЕУ има амбиции да го удвои својот удел на глобалниот пазар на чипови од помалку од 10 на 20 до 2030 година.
Интел ги објави германските планови во март минатата година, а во ноември го купи земјиштето за фабриката. Како што пишува ФТ, германското Министерство за економија соопшти дека владата во моментов разговара како да се закрпи дупка во планираниот проект предизвикан од значителното зголемување на трошоците во последните месеци.
Како што објави Интел на својата веб-страница, на изградбата на фабриката во Магдебург треба да работат 7.000 градежни работници, а кога ќе биде готова, ќе отвори 3.000 високотехнолошки работни места. Се чини дека не се плашат од недостигот на работна сила, бидејќи во поширокиот регион околу Магдебург има седум факултети со 20.000 студенти од технолошките области.
Американската компанија минатата пролет објави дека нејзиниот првичен план во ЕУ ќе биде 33 милијарди евра, кој вклучува германска фабрика, но и нов центар за истражување и развој во Франција и проширување на капацитетите што веќе ги имаат во Ирска, Италија, Полска и Шпанија. Ова, најавија, ќе и помогне на Унијата да ја создаде следната генерација на европскиот систем за производство на чипови и во исто време да одговори на глобалната потреба за побалансиран и поотпорен синџир на снабдување, објави Јутарњи лист.