Меѓународниот монетарен фонд (ММФ) во вторникот ги подобри своите економски изгледи за Азија во 2023 година благодарение на закрепнувањето на Кина што го поткрепува растот, но предупреди на ризиците од непопустлива инфлација и нестабилноста на глобалниот пазар поттикнати од проблемите во западниот банкарски сектор.
Повторното отворање на кинеската економија ќе биде клучно за регионот и се верува дека ова прелевање во Азија ќе биде фокусирано на потрошувачката и побарувачката во услужниот сектор, а не на инвестициите, соопшти ММФ.
„Азија и Пацификот ќе бидат најдинамичните од најголемите региони во светот во 2023 година, водени главно од позитивните изгледи за Кина и Индија“, се вели во извештајот на ММФ за регионалните економски прогнози.
„Како и во остатокот од светот, домашната побарувачка се очекува да остане најголемиот двигател на раст низ Азија во 2023 година.
ММФ очекува азиската економија да порасне за 4,6 отсто оваа година, по растот од 3,8 отсто во 2022 година, зголемувајќи ја прогнозата за раст за 0,3 процентни поени во однос на октомври.
Кина и Индија, како што е наведено во извештајот, ќе бидат клучните двигатели, со стапки на раст од 5,2 и 5,9 проценти, соодветно, иако растот во остатокот од Азија исто така се очекува да го достигне најниското ниво оваа година, пренесе агенцијата Хина.
