Според членот на Управниот совет на Европската централна банка и поранешен португалски министер за финансии Марио Сентено, невиденото зголемување на каматните стапки на ЕЦБ нема да го намали економскиот раст во еврозоната.
„Економијата добро реагираше — нашата економија сè уште расте, иако со побавно темпо“, рече Сентено.
Додека креаторите на политиката го означуваат крајот на кампањата за затегнување на каматните стапки, бидејќи инфлацијата полека се враќа кон целта од 2 отсто, некои критичари велат дека зголемувањето на каматните стапки би можело да се протега надвор од следните два состаноци на централната банка во јуни и јули.
Оние кои се залагаат поскапувањата да се стопираат што поскоро, укажуваат на германската рецесија што беше потврдена минатата недела, како и на побавното од очекуваното зголемување на потрошувачките цени овој месец во Шпанија.
Резултатите објавени во вторникот беа „пониски од очекувањата на пазарот, што значи дека ја забавуваме инфлацијата“, рече Сентено, кој исто така ја предводи централната банка на Португалија.
Повеќе за тоа како реагираше еврозоната неодамна ќе се знае во четврток, кога ќе бидат објавени најновите податоци за инфлацијата во овој блок земји, како и во другите економии на Европската унија.