Шпанија очекува повеќе туристи ова лето отколку пред пандемијата, откако меѓународните туристички пристигнувања во април беа за 1,2 отсто повисоки отколку во истиот месец од предпандемијата 2019 година, рече министерот за туризам.
„Податоците одразуваат извонредно закрепнување во туризмот. Се чини дека сè укажува дека ќе ги срушиме рекордите од 2019 година“, изјави Хектор Гомез.
Владата предвидува дека Шпанија ќе биде домаќин на меѓу 52,3 и 54,8 милиони туристи во периодот од мај до октомври, нешто повеќе отколку во истиот период во 2019 година, што е рекорд за туризмот.
Во април, на самиот почеток на клучната туристичка сезона која ја опфаќа неделата околу Велигден, според официјалните податоци, Шпанија ја посетиле 7,2 милиони странски гости.
Министерот рече дека приоритет на Шпанија е да привлече патници од далечните пазари како што се САД, Кина, Јужна Кореја и Јапонија. Владата неодамна одржа неколку состаноци со азиските авиокомпании за зајакнување на врските, рече министерот.
До крајот на јуни треба повторно да се воспостават некои линии, додаде тој.