Низ годините се шират различни гласини за плановите на Apple кои барем досега не се остварија. Главно се пишуваше за нивниот автомобил и откако постојано ги менуваа плановите, на крајот се откажаа од тој голем и амбициозен проект. Друг таков проект за кој размислувале, но и заклучиле дека не вреди да се започне со негово развивање е телевизор.
За телевизорот на Apple се зборуваше уште кога Стив Џобс беше жив, помеѓу 2009 и 2011 година, а сега изгледа дека Тим Кук повторно почна да размислува за развој на телевизор со логото на Apple.
Сепак, љубителите на оваа компанија не треба прерано да се радуваат бидејќи, доколку на крајот Apple одлучи да претстави телевизор, ќе помине уште многу време. Според Марк Гурман, Apple планира во наредните години да воведе неколку уреди од категоријата паметни домашни уреди, а првиот таков уред најверојатно ќе биде паметен екран кој ќе може да се постави на ѕид и преку кој ќе бидат контролирани. Доколку тој екран се покаже како успешен и корисниците покажат голем интерес за него, тогаш Apple ќе почне да развива и произведува други уреди од таа категорија, вклучително и телевизори.
Може да очекуваме воведување на паметен екран во првата половина на следната година, а доколку нема побарувачка за него, Гурман вели дека Тим Кук и Apple би можеле да ја преиспитаат промената на стратегијата околу паметните уреди за домаќинство, што може да значи нов палец надолу за нивниот ТВ.
Пазарот на телевизори во моментов е прилично заситен и доминираат кинески компании, како и јужнокорејски компании како Samsung и LG, а ќе биде доста интересно да се види какви иновации би можел да донесе телевизорот на Apple. Познавајќи ја оваа компанија, јасно е дека ќе биде премиум уред кој нема да биде евтин и дека ќе има силна интеграција со екосистемот на Apple, но прашање е дали компанијата ќе воведе и некој новитет кој би можел да привлече поголем број на клиентите.
