Администрацијата на САД развива план за олеснување на санкциите против Русија, велат изворите. Според нив, Белата куќа им наредила на Стејт департментот и Министерството за финансии да подготват список на санкции кои би можеле да бидат укинати.
Според еден од изворите на Ројтерс, оваа листа треба да се разговара со руските претставници на претстојните преговори. Надлежните органи во моментов подготвуваат предлози за укинување на санкциите за одредени правни и физички лица, меѓу кои и некои руски олигарси, наведуваат извори на британската агенција.
САД почнаа да воведуваат санкции против Русија во 2014 година по анексијата на Крим кон Руската Федерација. Подоцна, овие ограничувања беа заострени неколку пати. Минатата недела американскиот претседател Доналд Трамп ги продолжи санкциите за уште една година, но во исто време навести можност за нивно укинување во иднина.
Русија е еден од најголемите светски производители на нафта и доколку се ублажат американските санкции за нејзиниот енергетски сектор, тоа би можело да помогне да се спречи растот на цените на горивото, доколку Трамп ги заостри ограничувањата за извозот на нафта од членката на ОПЕК, Иран.
Западните влади, предводени од Вашингтон, воведоа ограничување на цената на руската нафта од 60 долари за барел. Администрацијата на поранешниот американски претседател Џо Бајден дополнително ги санкционираше руските енергетски компании и бродови што превезуваат руска нафта, вклучувајќи ги и најстрогите мерки досега, воведени на 10 јануари, непосредно пред Бајден да ја напушти функцијата.
Трамп во јануари се закани дека дополнително ќе ги заостри санкциите кон Русија доколку рускиот претседател Владимир Путин не покаже подготвеност да преговара за крај на војната во Украина. Меѓутоа, неодамна претставници на администрацијата на Трамп отворено зборуваат за можноста за олеснување на санкциите кон Москва.