Американската технолошка корпорација Google објави дека на 20 август ќе го организира настанот „Made by Google“ во Њујорк, каде што компанијата ќе претстави нови модели на паметни телефони, часовници и безжични слушалки од својата серија Pixel.
Настанот ќе започне во 19:00 часот по средноевропско време, а веројатно е дека Google ќе обезбеди пренос во живо преку платформата YouTube.
Фокусот ќе биде на новите Pixel 10 телефони, вклучувајќи го и основниот модел кој, според гласините, за прв пат треба да добие систем со три задни камери, објави Verge.
Се очекува и премиерата на понапредните варијанти на телефоните Pixel 10 Pro и Pixel 10 Pro XL, како и преклопниот модел на Pixel 10 Pro Fold, за кој се вели дека е целосно отпорен на прашина.
Покрај телефонот, Google би можел да ја прикаже и четвртата генерација на Pixel Watch со поголема батерија, додека љубителите на аудио би можеле да бидат заинтересирани за слушалките Pixel Buds 2a.
Компанијата сè уште не ги потврди овие гласини, но најавите укажуваат на дополнителни подобрувања во областа на издржливоста и мултифункционалноста на уредот.
