Фармацевтскиот гигант Фајзер објави дека ја купува биотехнолошката компанија Метсера во договор вреден околу 10 милијарди долари, со што влегува во една од најбрзо растечките области во светската фармацевтска индустрија – развојот на лекови против дебелина.
Со ова преземање, Фајзер директно се вклучува во пазарната конкуренција со компаниите Ново Нордиск и Ели Лили, кои веќе доминираат на глобалниот пазар на лекови за слабеење.
Борбата за нов пазар вреден десетици милијарди
Според извештаите на Ројтерс и АП, Фајзер ја надмина понудата на данскиот производител на лекови Ново Нордиск, кој исто така се натпреваруваше да го преземе Метсерa.
Фајзер ќе плати околу 65,60 долари по акција во готово, со дополнителни плаќања до 20,65 долари по акција во зависност од успехот на одредени развојни пресвртници.
Вкупната вредност на понудата со тоа достигнува приближно 86 долари по акција, или околу 10 милијарди долари.
Метсера, со седиште во Бостон, е фокусирана на развој на иновативни терапии за дијабетес и дебелина, вклучувајќи експериментални лекови кои ги таргетираат хормоните слични на популарните лекови Оземпик и Вегови.
Стратешки пресврт на Фајзер
По рекордните приходи за време на пандемијата благодарение на вакцината Комирнати и лекот Паксловид, Фајзер се соочи со опаѓање на продажбата во последните години.
Оваа аквизиција претставува стратешки пресврт кон нови пазарни сегменти кои ветуваат долгорочен раст.
Се проценува дека пазарот на лекови против дебелина ќе вреди повеќе од 100 милијарди долари до 2035 година, што го прави еден од најпрофитабилните сектори во фармацевтската индустрија.
– „Метсера“ носи силна истражувачка база и портфолио на терапевтски кандидати што ќе ја зајакнат нашата позиција во сегментот на метаболички заболувања – објави „Фајзер“.