Глобалното производство на вино, според првите прелиминарни проценки, се зголемило во 2025 година на 232 милиони хектолитри, што е за три проценти повеќе отколку во 2024 година, но сепак седум проценти под петгодишниот просек, објави денес Меѓународната организација за лозарство и вино (OIV).
Италија е најголемиот светски производител на вино со 47,3 милиони хектолитри, пред Франција со 35,9 милиони хектолитри и Шпанија со 29,4 милиони хектолитри.
Соединетите Американски Држави се на четврто место, додека Австралија се опоравува од намалената берба во 2024 година и го зазема петтото место, пред Аргентина, која е најголемиот производител на вино во Јужна Америка.
Во Европа, Франција ја забележа најмалата жетва од 1957 година, додека производството во Шпанија падна на најниско ниво во последните 30 години. Италија, пак, забележа зголемување од осум проценти благодарение на поволните временски услови.
Соединетите Американски Држави очекуваат производство од 21,7 милиони хектолитри оваа година, што е за три проценти повеќе од минатата година, но сепак девет проценти под петгодишниот просек.
Климатската варијабилност останува главен фактор што го обликува глобалното производство, а поволните услови во некои региони не се доволни за да ги компензираат загубите на други места, се наведува во извештајот на веб-страницата на OIV.
