На Волстрит, цените на акциите пораснаа трет ден по ред во вторникот, најмногу во секторот за производители на чипови, при што индексот Дау Џонс достигна нов рекорден максимум.
Дау Џонс доби 0,99 проценти, на 49.462 поени, додека S&P 500 порасна за 0,62 проценти, на 6.944 поени, а индексот Nasdaq за 0,65 проценти, на 23.547 поени.
На најголемата берза во светот, повторно владее еуфорија во врска со развојот на вештачката интелигенција, па затоа цените на акциите на производителите на чипови, меморија и друга технолошка опрема најмногу пораснаа.
Цената на SanDisk скокна за 27 проценти, на Western Digital за 17, на Seagate за 14, а на Micron Technology за 10 проценти.
Во исто време, индексот PHLX на секторот за производители на чипови порасна за 2,75 проценти. Бидејќи тој индекс скокна за околу 8 проценти во првите три трговски дена од оваа година, вчера достигна ново рекордно ниво.
Зголемувањето на цените на акциите од почетокот на годината се должи, велат аналитичарите, на верувањето на инвеститорите дека претстои добра сезона на деловни резултати на компаниите за последниот квартал од минатата година.
Таа сезона започнува деновиве и ќе трае во следните неколку недели.
Рекорди и на европските берзи
Цените на акциите вчера пораснаа и на европските берзи. Лондонскиот индекс FTSE зајакна за 1,18 проценти, на 10.122 поени, додека франкфуртскиот DAX порасна за 0,09 проценти, на 24.892 поени, а парискиот CAC за 0,32 проценти, на 8.237 поени.
Благодарение на ова, индексот STOXX 600 на водечките европски акции порасна за 0,6 проценти и достигна ново рекордно ниво.