Во петте години по Брегзит, деловната соработка на членките на Европската Унија од Централна и Источна Европа со Велика Британија значително напредуваше, со зголемување на трговијата и инвестициите на британскиот пазар, според извештајот на Британската амбасада во Варшава презентиран минатата недела во Лондон.
Излегувањето на Велика Британија од ЕУ, пишува Хина, означи период на неизвесност за многу европски компании, но во исто време послужи како поттик за нив да се прошират на британскиот пазар.
Податоците од Европскиот завод за статистика објавени во јануари покажаа дека Велика Британија била главната дестинација на одливот на странски директни инвестиции од земјите-членки на ЕУ минатата година, со вредност од 57,8 милијарди евра.
Имено, поради потешкиот извоз, компаниите почнале да отвораат подружници таму, за да можат да продолжат да работат и по Брегзит.
Иако земјите од Централна и Источна Европа не се меѓу водечките инвеститори на британскиот пазар, бидејќи нивниот сооднос на странски директни инвестиции во бруто домашниот производ е значително помал од европскиот просек, капиталот што компаниите од тој регион го инвестираат во Обединетото Кралство континуирано расте.
Така, во периодот од 2020 до 2025 година, компаниите од таа група земји, според податоците на британското Министерство за економија, реализирале 204 инвестициски проекти и отвориле речиси 14 илјади нови работни места во Британија.
Во исто време, полските компании се далеку понапред во инвестициите, имплементирајќи дури половина од споменатите проекти и креирајќи повеќе од две третини од работните места.
Хрватска е на петто место меѓу земјите од Централна и Источна Европа, со пет проценти учество во реализираните проекти, или четири проценти во бројот на отворени работни места, според податоците од британското Министерство.
Чешките компании имплементираа 15 проценти од проектите и создадоа пет проценти од работните места, додека учеството на романските компании во проектите беше седум проценти, а во вработувањето 15 проценти.
Најчесто стануваше збор за иновативни технолошки компании кои сакаат да работат во Велика Британија, но и ја користат како „отскочна даска“ за влез на други светски пазари.