Кинеските производители на автомобили забрзано бараат постоечки фабрики низ Европа со цел што поскоро да го локализираат производството пред новите европски правила за локална содржина, пишува Ројтерс. Консултантот на BYD, Алфредо Алтавила, вели дека на неговите патувања постојано се среќава со директори од конкурентни компании кои го прават истото.
Производителите првенствено бараат постоечки погони за склопување автомобили бидејќи можат да ги реновираат и да ги стават во функција многу побрзо отколку што би било потребно за изградба на нова фабрика од темел, изјави Алтавила за Ројтерс.
За BYD, Шпанија и Франција во моментов се меѓу најизводливите опции за нова фабрика, првенствено поради достапноста на фабрики и поедноставните услови за нивно преземање. Клучното прашање ќе биде колку би чинело реконструкцијата на избраната локација. Алтавила, исто така, рече дека постојано посетува фабрики низ цела Европа и дека по настанот во Торино ќе патува во Англија за да провери друга фабрика.
„Сите ќе се сретнеме еден со друг на аеродромите“, ја опиша тој трката на кинеските производители за европски производствени капацитети.
Европа воведува построги правила за локално производство
Во позадина на трката за фабрики е Европскиот закон за индустриски акцелератор, со кој Европската комисија сака да го зголеми уделот на европското производство во стратешките индустрии, вклучително и автомобилската индустрија.