Зголемената потрошувачка на електрична енергија на центрите за податоци посветени на вештачката интелигенција (ВИ) предизвикува загриженост кај инвеститорите и локалните заедници, но некои експерти во финансискиот сектор предупредуваат дека нивното влијание врз глобалните емисии не треба да се преувеличува или да се дозволи да ги засени многу поголемите извори на емисии, објавува Блумберг.
Аникет Шах, директорка за стратегија за одржливост и енергетска транзиција во американската финансиска компанија Џефрис, процени дека растот на побарувачката на центри за податоци во моментов не е меѓу петте главни двигатели на климатските промени.
„Климатските промени значат намалување на околу 50 милијарди тони емисии на стакленички гасови на нула, па затоа мора да погледнеме што ги движи правилно. Растот на побарувачката на центрите за податоци всушност не е меѓу петте главни“, рече Шах пред Неделата на климата во Њујорк, која започнува денеска.
Во април, Меѓународната агенција за енергија (IEA) објави дека, земајќи го предвид очекуваното удвојување на потрошувачката на електрична енергија до крајот на деценијата, центрите за податоци ќе сочинуваат само три проценти од глобалната побарувачка до 2030 година.
„Севкупно, емисиите поврзани со центрите за податоци – не само оние што ја напојуваат вештачката интелигенција – се на добар пат да сочинуваат околу два проценти од оние што ги емитува глобалниот енергетски сектор до 2035 година“, се додава во соопштението на IEA.