Светската стручна јавност алармира за сè поголем недостиг од животински протеин во наредните 30 години, а ваквата состојба ја наметнува потребата од изнаоѓање на алтернативни извори за негово обезбедување.
Аквакултурата е еден од нив и затоа во годините пред нас, како држава, институција и ветеринарна фела, треба да посветиме сè поголемо внимание за нејзин развој. Во функција на унапредување на рибарството во земјава е финансиската поддршка којашто ја дава државава за развој на сточарството, за отворање на нови и осовременување на постоечките објекти за аквакултура. Можност за унапредување на оваа гранка, има и преку европските фондови. Ова го истакна директорот на Агенција за храна и ветеринарство (АХВ) Зоран Атанасов, на отворање на дводневната работилница за болести кај животни од аквакултурата, која на барање на Агенција за храна и ветеринарство ја организира Ветеринарна комора на Република Северна Македонија, со цел утврдување на нивото на знаење во оваа област на докторите по ветеринарна медицина и планирање на понатамошни форми за континуирана едукација.
Во однос на аквакултурата, како што истакна директорот Атанасов, различни се принципите во делот на производството во споредба со останатите гранки од сточарството и во Европа и затоа, како држава аспирант за членство во Унијата, како институции и оператори, ќе треба се прилагодиме и да ги следиме овие принципи. Тоа, додаде тој, бара од нас и како стручна фела, постојано да ги унапредуваме знаењата од областа на ветеринарството кои се однесуваат на аквакултурата.
На работилницата, како што информира претседателот на Ветеринарната комора, Томислав Николовски, своите знаења и искуства од оваа гранка од сточарството ги пренесуваат домашни и странски експерти. За епидемиологијата, дијагностиката и клиничката слика на болестите кај пастрмките, проф.д-р Стојмир Стојановски од Хидробиолошкиот завод – Охрид, изведе практична вежба на која беше објаснет и начинот на земање и дистрибуција на мостри.
Претставници од Агенцијата за храна и ветеринарство ги презентираа обврските согласно Годишната наредба за здравствена заштита на животните, а во текот на утрешниот ден ќе се дискутира и за законската рамка за производство и ставање во промет на аквакултура, биосигурносните мерки како и пристапот во оваа област од аспект на ветеринарното јавно здравство.
