Амазон ефективно предложи да ја откупи платформата ТикТок, на која претстои забрана во Соединетите Американски Држави вo сабота поради нејзиното кинеско потекло, соопшти синоќа службеник од администрацијата на американскиот претседател Доналд Трамп.
Официјалниот претставник, кој побара да остане анонимен, изјави дека Амазон ја доставил понудата во писмо до американскиот потпретседател Џеј Ди Венс и министерот за трговија Хауард Лутник.
На денот на неговата претседателска инаугурација на 20 јануари, Трамп и даде дополнителен рок на платформата TикТок да пронајде купувач. Со тоа го избегна спроведувањето на законот донесен на иницијатива на двете најголеми американски партии. Тој закон за забрана на работењето на ТикТок го потврди и Врховниот суд на САД, оценувајќи дека е неопходен за националната безбедност.
Сопственик на TикТок е кинеската фирма Byte Dance, која според законот е должна да ја продаде својата платформа на некој што не е од Кина, во спротивен случај платформата ќе биде отстранета од интернет во САД.
Трамп нагласи дека може да го продолжи одложувањето на стапувањето во сила на мерката, но исто така рече и дека очекува некаков договор до сабота.
Амазон одби да ги коментира информациите, а Тик-Ток не одговори веднаш на барањето за коментар.