Американци хакираат мозоци на муви (ВИДЕО)

8

Напредокот во разбирањето како функционира човечкиот мозок им овозможи на научниците да истражуваат начини за постигнување на претходно незамисливи цели. На пример, истражувачки проект на Националната научна фондација на САД (NSF) и Агенцијата за напредни истражувачки проекти за одбрана (DARPA) развива технологија за слушалки што може да ја чита невронската активност на мозокот и да ја снима за друго лице.

Програмата за магнетен, оптички, акустичен невронски пристап (MOANA) има за цел да развие безжични слушалки кои можат да ја олеснат комуникацијата од мозок до мозок на нехируршки начин.

Како дел од тој проект, опишан во списанието Nature Materials, истражувачки тим предводен од Џејкоб Робинсон, вонреден професор на Универзитетот Рајс, развил метод за безжично хакирање на мозокот на мувите. Оваа безжична технологија овозможува да се контролираат невроните во мозокот на мувата за помалку од една секунда.

Истражувачите користеле генетски инженеринг за да изразат посебен јонски канал во невронските клетки на мувата, кој може да се активира со топлина. Кога ќе се активира јонскиот канал, мувите ги шират своите крилја, како што би правеле за време на парењето.

За да го активираат каналот по желба, истражувачите им инјектирале на мувите наночестички кои може да се загреат со примена на магнетно поле. Генетски модифицираните муви потоа биле внесени во куќиште кое имало електромагнет на врвот и камера за снимање на движењата на мувите.

Со активирање на електромагнетот, електричното поле ги загрева наночестичките, кои пак ги активираа невроните, а мувите ги раширија крилјата, што е видливо и во приложеното видео. Истражувачите откриле дека временското доцнење помеѓу активирањето на електромагнетот и проширувањето на крилата е помалку од половина секунда.

Робинсон е уверен дека оваа способност за прецизно активирање на клетките ќе биде корисна во проучувањето на мозокот, развојот на мозочната комуникациска технологија и лекувањето на нарушувања поврзани со мозокот.

Имено, истражувачите сакаат да развијат технологија која ќе помогне да им се врати видот на слепите лица. Тие имаат намера да го постигнат тоа со стимулирање на деловите од мозокот поврзани со видот и без операција.