Ауди, премиум брендот на групацијата Фолксваген, ја разгледува можноста за изградба на фабрика во Соединетите Американски Држави, како дел од сценарио што би можело да го смири претседателот Доналд Трамп во контекст на трговски спор околу царините.
Според неделникот „Шпигел“, „Ауди“ размислува за изградба на фабрика во јужниот дел на САД, што би било најсложеното и најскапото решение од неколкуте опции на маса. Цената на таков проект се проценува на околу четири милијарди евра (околу 4,6 милијарди долари), пренесува „Ројтерс“.
„Ауди“ изјави дека компанијата сака да го зајакне своето присуство на американскиот пазар. „Моментално разгледуваме различни сценарија. Уверени сме дека до крајот на годината ќе донесеме одлука, во договор со групацијата „Фолксваген“, за тоа како ќе изгледа тој план“, се вели во соопштението.
„Ауди“ нема сопствено производство во САД, додека „Фолксваген“ веќе поседува фабрика во Тенеси, а гради друга во Јужна Каролина.
Најавата на американскиот претседател за воведување широки царини веќе ги чинеше германските производители на автомобили стотици милиони евра, поради нивната голема зависност од извозот, истакнуваат претставници на автомобилската индустрија.
БМВ, Мерцедес-Бенц и Фолксваген моментално се во преговори со претставници во Вашингтон за можен договор за увозни тарифи, користејќи ги своите инвестиции и извоз од САД како аргумент за ублажување на мерките на САД.
Фото: Pixabay