Baidu претстави футуристичко робо-такси (ВИДЕО)

8

Кинеската компанија Baidu претстави автономно возило од следната генерација и сака да понуди такси услуги без возач по половина од цената на конвенционалните такси.

Робо-такси возилото наречено Apollo RT6 треба да се приклучи на услугата за превоз на патници Apollo Go во Кина следната година, а планирано е да произведе десетици илјади единици.

Baidu вели дека Apollo RT6, целосно електричен автомобил, е подготвен за производство со отстранлив волан. Дизајнот без волан ослободува повеќе простор за создавање уникатни ентериери, овозможувајќи инсталирање на дополнителни седишта, автомати, десктоп компјутери или конзоли за игри.

Со должина од 4.760 mm и меѓуоскино растојание од 2.830 mm, Apollo RT6 нуди удобност со независни задни седишта, доволно заден простор за нозете од 1.050 mm, целосно рамен под и интелигентен систем за интеракција.

Baidu во соопштението рече дека надворешноста на Apollo RT6 има револуционерен изглед кој беспрекорно ги интегрира сензорите на подвижниот покрив заедно со интерактивни светла и интелигентни електрични лизгачки врати за дополнително да го подобри искуството во возењето.

Возилото користи 38 сензори, вклучувајќи 8 LiDAR и 12 камери, а безбедноста и доверливоста на Apollo RT6 се поддржани од огромен број реални податоци, со вкупна тест километража од над 32 милиони километри поминати до денес со автономниот Baidu автомобил, со различни нивоа на автономија.

Apollo RT6 е првиот модел на возило изграден на Xinghe, автомобилската E/E архитектура на Baidu специјално развиена за целосно автономно возење.