Комитетот за отворен пазар на Федералните резерви (FOMC) ќе донесе одлука за идните каматни стапки на првиот состанок за монетарната политика во годината, кој започнува денеска, а завршува во среда.
Според општото мислење на економските аналитичари во САД, тие нема да ги променат и покрај различните барања на американскиот претседател Доналд Трамп.
Минатата недела, во видео обраќање на Светскиот економски форум во Давос, Трамп изрази очекување дека ќе има намалување на основната каматна стапка во САД, но се чини дека лидерите на американската централна банка нема да го сторат тоа. Една од главните причини за претпазливоста на Федералните резерви (ФЕД) е политиката на новиот американски претседател.
Трамп најавува намалување на даноците, воведување високи царини за увоз и депортација на илегални имигранти, што, според пишувањата на медиумите, веќе доведе до недостиг на работна сила на некои места. Сето ова може да ја забрза инфлацијата и во тој случај централната банка ќе мора да одговори со зголемување на каматните стапки.
Претседателот на ФЕД Џером Пауел, кој во среда по завршувањето на седницата ќе ги претстави одлуките за натамошната монетарна политика во САД, по последниот состанок на ФОМЦ во декември минатата година рече дека ќе остане претпазлив и ќе го следи развојот на инфлацијата и ситуацијата на пазарот на трудот. Доколку двете области останат цврсти, ќе се разгледаат дополнителни намалувања на основната каматна стапка, предвиде тој.