Основачот на Мајкрософт, филантроп и еден од најбогатите луѓе во светот, Бил Гејтс, даде големо интервју за документарниот филм на Би-Би-Си The Making of Bill Gates.
Во тоа интервју, Гејтс откри нови бројки за тоа колку неговата фондација потрошила во борбата против болестите што може да се спречат и намалувањето на сиромаштијата ширум светот. „Донирав над 100 милијарди долари“, вели тој. „Но, ќе дадам повеќе.
Ко-основачот на Мајкрософт и неговиот долгогодишен соработник и познат инвеститор Ворен Бафет го здружија своето богатство преку фондацијата Гејтс, која Бил ја основа со неговата поранешна сопруга Мелинда.
Вели дека ужива да донира.
Гејтс вели дека филантропијата била дел од неговото воспитување. Неговата мајка често го потсетувала дека „со богатството доаѓа и одговорноста да се сподели“.
Тој нагласува дека ужива да донира пари – досега има насочено околу 60 милијарди долари од своето богатство во Фондацијата. Што се однесува до неговиот личен живот, тој вели дека не чувствува никаква разлика: „Ништо не сум жртвувал. Ниту сум нарачал помалку хамбургери, ниту сум гледал помалку филмови“. Сè уште може да си дозволи приватен авион и луксузни куќи.
Колку ќе им остави на своите деца?
Тој планира да го донира „огромното мнозинство“ од своето богатство, но вели дека често разговарал со своите три деца за тоа колку да им остави. Дали ќе бидат сиромашни по неговата смрт? „Не“, одговара тој со насмевка. „Апсолутно ќе бидат добро, иако процентуално тоа не е голема сума.
Гејтс вреди околу 160 милијарди долари, па дури и мал процент од тоа богатство значи дека неговите деца ќе бидат многу богати.