Германската биотехнолошка компанија BioNTech објави во четврток дека има намера да го купи домашниот конкурент CureVac за околу 1,25 милијарди долари за да го прошири својот бизнис во терапии за рак базирани на технологија на информациска рибонуклеинска киселина (mRNA).
BioNTech ќе издаде американска депозитарна потврда (ADR) во вредност од приближно 5,46 долари по акција на CureVac, со што компанијата ќе биде проценета на приближно 1,25 милијарди долари, се вели во соопштението. Износот е за 55 проценти повисок од просечната цена на акциите на CureVac пред три месеци, се додава во соопштението.
Акционерите на CureVac со тоа ќе станат сопственици на четири до шест проценти од акциите во BioNTech, а трансакцијата треба да се заклучи до крајот на годината, под услов да добие зелено светло од регулаторот.
Германската влада поседува приближно 13 проценти од CureVac врз основа на финансиска поддршка за компанијата за време на пандемијата. Берлин во четврток изјави дека во принцип го поддржува создавањето на „нов германски шампион во биотехнолошката технологија“, додавајќи дека ќе ја проучи понудата на BioNTech.
Тие развија вакцини против ковид
И BioNTech и CureVac станаа познати на јавноста за време на пандемијата на ковид-19. Двете компании развија вакцина, но додека BioNTech, заедно со партнерот Pfizer, објавија стапка на ефикасност од 95 проценти, CureVac достигна нешто под 50 проценти.
Во меѓувреме, BioNTech се сврте кон имунотерапија за рак и има намера да поднесе своја прва апликација за лиценца за хемотерапија од нова генерација за рак на матката во САД до крајот на годината.
Пред една година, CureVac го продаде својот бизнис за развој на вакцини против ковид и грип на GSK за да се фокусира на онкологија.
Фото: pixabay
