Бројот на електрични возила порасна за околу една третина на глобално ниво минатата година, на 55,8 милиони, според податоците од германскиот институт ZSW.
Досега најмногу електрични возила имало во Кина, со 31,4 милиони. Кинескиот BYD е на прво место меѓу производителите на електрични возила.
Соединетите Американски Држави беа на второ место минатата година (6,4 милиони), а Германија на трето место (2,6 милиони). Норвешка, која е позната по својата брза транзиција кон електрична мобилност, имаше нешто повеќе од еден милион електрични возила, објави оваа недела Истражувачкиот центар за сончева енергија и водород во Баден-Виртемберг (ZSW).
Податоците вклучуваат целосно електрични возила и плаг-ин хибриди.
Кинескиот BYD имаше најголем удел на електрични возила на глобално ниво минатата година, со 10,6 милиони. По нив следуваат Tesla со 7,3 милиони и Volkswagen со 4,3 милиони. Двајца други германски производители се меѓу првите десет, BMW со 2,5 милиони на шестото место и Mercedes-Benz со 1,6 милиони на осмото.
Како што истакна институтот, за неколку години можеме да очекуваме многу повеќе кинески производи во првите десет. „Поради големината на кинескиот пазар и доминацијата на кинеските производители на него, сè повеќе производители кои сè уште се релативно непознати во Европа се пробиваат меѓу првите десет“, додадоа тие.
Фото: Pixabay