На девизните пазари, девизниот курс на доларот продолжува да се движи околу своето најниско ниво во последните пет месеци во однос на еврото и другите пет главни светски валути додека инвеститорите се обидуваат да сфатат какво ќе биде економското влијание од зголемените глобални трговски тензии.
Тие се плашат од агресивната тарифна политика на американскиот претседател Доналд Трамп, која може да предизвика значително економско забавување, а тоа го поткопува курсот на американската валута, особено во светло на фактот дека голем број истражувања веќе покажаа слабеење на деловните очекувања.
Индексот на доларот, кој ги мери перформансите на доларот во однос на шесте главни светски валути, во вторникот наутро изнесуваше 103,44 поени и сè уште се движи близу петмесечен минимум од 103,21 поени, што го допре минатиот вторник. Сега е намален за околу 6 отсто од средината на јануари кога изнесуваше 110,17 поени, што е највисоко ниво во последните две години.
Доларот не доби речиси никаква поддршка од податоците за благ пораст на продажбата на мало во САД во февруари, по падот од 1,2 отсто во јануари.
Во исто време, еврото се тргуваше околу 1,0919 долари пред гласањето во германскиот парламент за стимулативен пакет од 500 милијарди евра, кој ќе ја финансира инфраструктурата и значително ќе ги промени правилата за задолжување за да овозможи финансирање на одбраната и да ја заживее најголемата економија во еврозоната.
Курсот на доларот, сепак, зајакна во однос на јенот за благи 0,07 отсто, на 149,3 јени. Банката на Јапонија го започна својот дводневен состанок, на кој се очекува креаторите на монетарната политика да разговараат за ризиците од ескалација на трговската војна на САД врз јапонската економија, што ќе биде клучно за нивните понатамошни монетарни потези. Се очекува дека BOJ може повторно да ги зголеми каматните стапки подоцна оваа година.
И со оглед на бројните несигурности кои влијаат на глобалната економија во моментов, инвеститорите имаат зголемена тенденција да инвестираат во побезбедни средства, па цената на унца злато повторно надмина 3.000 долари – достигнувајќи рекордно високо ниво од 3.025,4 долари.