Извршен директор на Meta Platforms Inc. Марк Цукерберг изрази уверување во стратегијата за вештачка интелигенција (ВИ) на неговата компанија, наведувајќи дека 2025 година ќе биде „многу значајна“ година бидејќи нивниот асистент за вештачка интелигенција ќе стане најшироко користен во индустријата.
„Очекувам ова да биде година кога високо интелигентниот и персонализиран асистент за вештачка интелигенција ќе достигне повеќе од милијарда корисници“. „И очекувам Мета ВИ да биде водечкиот асистент за вештачка интелигенција“, им рече Цукерберг на инвеститорите во средата, откако го објави својот извештај за заработката за четвртиот квартал, пренесува Блумберг.
Цукерберг нагласи дека Мета планира да потроши стотици милијарди долари на инфраструктура за вештачка интелигенција, имитирајќи и подобрувајќи ги технологиите на конкурентите за да обезбеди доминација на пазарот.
Овие изјави ја зголемија цената на акциите на Мета за дури 4,5 отсто во продолженото тргување по затворањето, на 676,49 долари по акција.
Мета објави прогноза за приходите за првиот квартал помеѓу 39,5 и 41,8 милијарди долари, при што просечната е под 41,7 милијарди долари што се очекуваше според податоците. Во четвртиот квартал Мета оствари приход од 48,4 милијарди долари, над очекуваните 47 милијарди долари, а најголемиот дел од приходите сè уште се генерирани од реклами на социјалните мрежи како Инстаграм и Фејсбук.
Овие изјави доаѓаат откако кинескиот стартап за вештачка интелигенција DeepSeek претстави модел развиен со пониски трошоци и помалку ресурси во споредба со постоечките технологии, што предизвика пад на вредноста на технолошките акции во САД и Европа за речиси 1 трилион долари.