Европа можеби ќе треба да го рационализира снабдувањето со енергија во текот на суровата зима што претстои поради намалените испораки на природен гас, изјави денеска извршниот директор на „Шел“, Бен ван Берден.
Во последниве месеци, европските земји се обидуваат да ги наполнат зимските складишта за природен гас, а Европската комисија нареди складиштата да достигнат најмалку 80 проценти до 1 ноември, објави Ројтерс.
Резултатот е дека цените на природниот гас што се користи за тешка индустрија и греење се зголемија, оптоварувајќи ги потрошувачите и владите.
„Ќе биде навистина тешка зима во Европа. Некои земји ќе поминат подобро од другите, но сите ќе се соочиме со многу значајно зголемување на цените на енергијата“, рече Ван Берден.
Во најлош случај, Европа ќе мора да ја рационализира потрошувачката на енергија, додаде тој.
Одредени земји посочија дека во случај на екстремен недостиг, тие ќе го ограничат снабдувањето со индустријата и ќе дадат приоритет на греењето на станбените згради.
Залихите во Европа моментално изнесуваат 62,6 отсто, а аналитичарите предупредуваат дека постигнувањето на целта од 80 отсто ќе биде неверојатно тешко доколку продолжат значителните прекини во снабдувањето со руски гас.
