Азиските берзи беа нестабилни во четврток, а доларот е под притисок, бидејќи можноста за предвремено назначување на нов претседател на Федералните резерви од страна на американскиот претседател Доналд Трамп предизвика загриженост за независноста и кредибилитетот на американската централна банка.
Притисокот врз доларот дополнително се зголеми по медиумските извештаи дека Трамп размислува да објави наследник на сегашниот шеф на ФЕД, Џером Пауел, до септември или октомври, иако неговиот мандат истекува дури во мај 2026 година. Аналитичарите го толкуваат овој потег како обид на Трамп да влијае на монетарната политика преку „сенковиот“ претседател на ФЕД, објавува Ројтерс.
Пазарите се смирија делумно благодарение на примирјето меѓу Израел и Иран, кое засега функционира, намалувајќи ги ризиците за снабдувањето со нафта. Сепак, трговците остануваат напнати околу рокот на Трамп на 9 јули за објавување нови тарифи доколку не се постигнат трговски договори, како и неговиот притисок врз ФЕД.
На берзите, индексот на акциите на Азиско-пацифичкиот регион на MSCI (без Јапонија) беше малку повисок, додека токискиот Никеи скокна за 1,5 проценти, достигнувајќи го највисокото ниво од крајот на јануари. Фјучерсите на европските акции укажуваат на мирен почеток на тргувањето, додека валутните пазари беа во фокусот. Еврото зајакна на највисоко ниво од септември 2021 година, достигнувајќи 1,6837 долари. Швајцарскиот франк достигна десетгодишен максимум, додека јапонскиот јен зајакна за 0,3 проценти на 144,815 за долар.
Трамп постојано го критикуваше Пауел за тоа што не ги намали каматните стапки и јавно размислуваше да го отстрани или наскоро да именува наследник, што ја разниша довербата на инвеститорите во американските средства и кредибилитетот на ФЕД. Аналитичарите очекуваат Трамп да го именува наследникот на Пауел како некој со полабави ставови за монетарната политика, поткопувајќи ја довербата во ФЕД и доларот.
Индексот на доларот, кој ја мери вредноста на американската валута во однос на шест други валути, падна на најниско ниво од март 2022 година. Тој изгуби 10 проценти од почетокот на годината, бидејќи инвеститорите бараат алтернативи поради стравот од ефектите од царините на Трамп врз растот на САД.
Двогодишниот принос на американските државни обврзници, кој обично се движи во согласност со очекувањата за каматните стапки, падна за 1,5 базични поени на 3,764 проценти, најниско ниво за седум недели.
Фото: Pixabay