Европската комисија денеска објави предлог за казнување на компаниите со најмалку 5,0 отсто од нивниот глобален промет доколку ги прекршат санкциите на ЕУ против Русија.
Во предлогот, за кој е потребно одобрение од Европскиот парламент и 27 земји-членки на ЕУ, се наведува и дека лицата кои ќе ги прекршат санкциите ќе се соочат со потенцијална затворска казна од најмалку пет години, пренесува Ројтерс.
Прекршувањето на санкциите против Русија веќе е кривично дело во некои земји од ЕУ, додека во други се третира како административен прекршок, а казните варираат во целиот блок.
„Сè уште има преголем јаз меѓу земјите-членки кога станува збор за казнување за кршење на санкциите на ЕУ“, рече во изјавата европскиот комесар за правда Дидие Рејндерс, додавајќи дека предложените правила ќе донесат кохерентност.