Цените на нафтата малку пораснаа на азиското тргување денес, бидејќи трговците продолжија да ги следат настаните на Блискиот Исток, каде што Израел и Иран се вклучија во серија напади, објави АФП.
Барел сурова нафта од Западен Тексас Интермедијар за испорака во јули се тргуваше по 75,40 долари, што е за 26 центи повеќе од среда. Фјучерсите на суровата нафта Брент за август се зголемија за 19 центи на 76,89 долари, според податоците на Блумберг.
Аналитичарите велат дека трговците се најмногу загрижени за евентуалното затворање на Ормутскиот теснец од страна на Иран, низ кој минуваат околу една петтина од светските залихи на нафта, објави АФП.
Шел, еден од најголемите трговци со нафта и природен гас во светот, има планови за непредвидени ситуации доколку конфликтот меѓу Израел и Иран ги наруши тековите од регионот, предупредувајќи дека потенцијалната блокада на Ормутскиот теснец би можела да предизвика значителен шок.
„Доколку таа артерија се блокира, од која било причина, тоа има огромно влијание врз глобалната трговија“, рече главниот извршен директор Ваел Саван на Јапонскиот енергетски самит и саем во Токио. „Имаме планови во случај работите да се влошат.“
Глобалниот пазар на енергија е парализиран од конфликтот меѓу Израел и Иран, вклучувајќи ја и можноста САД да одлучат да се приклучат на нападот. Досега, иако цената на суровата нафта се зголеми поради тензиите, немаше поголеми прекини во енергетскиот тек, иако трговците се во состојба на голема готовност за можноста.
Фото: Printscreen