Постигнат е договор меѓу земјите-членки на Европската Унија (ЕУ) и Европскиот парламент за реформа на начинот на кој се решава проблемот со банките што пропаѓаат, со цел зајакнување на финансиската стабилност и минимизирање на влијанието врз даночните обврзници.
Новата рамка дава поголема предвидливост на справувањето со вакви случаи и полесна применливост кај малите и средните банки, кои честопати се решаваа во согласност со националните прописи за несолвентност, наместо да се користат алатки во рамките на европското законодавство.
„Оваа важна реформа нуди повеќе опции за справување со малите и средните банки во криза“, наведува Единствениот одбор за резолуции, кој работи во рамките на банкарската унија на ЕУ. Неговата задача, меѓу другото, е да се справи со ситуациите на пропаѓање на банките.
Сега ќе биде полесно да се користи единствениот фонд за резолуции на еврозоната и националните шеми за гаранција на депозити за покривање на трошоците за решавање на несолвентноста на помалите банки.
Овие извори, како што објави „Фајненшл тајмс“, сега ќе можат да се користат за премостување на јазот кога банката нема доволно капитал за покривање на загубите, со што ќе се избегне потребата од државно спасување на банките.
Сепак, користењето на овие средства ќе биде под строг надзор и правила.
Надлежните регулатори ќе продолжат да инсистираат на минималниот потребен капитал на банките како прва линија на одбрана, а поддршката од шемите за осигурување на депозити ќе биде излез во случај на вонредна состојба.
Изменетите правила, исто така, предвидуваат тестирање за да се покаже дали спасувањето е попрофитабилно од ликвидацијата.
Новите критериуми ќе ги земат предвид и економските нарушувања во делови од ЕУ што можат да влијаат на помалите банки.
„Договорот докажува зајакнување на европската интеграција и поголема достапност на единствен фонд за закрепнување и отвора пат кон хармонизирана рамка и намалување на примената на националните решенија“, изјави претседателката на Комисијата за економија на Европскиот парламент, Аурора Лалук.