Земјите од ЕУ почнаа со подготовките за 17-тиот пакет антируски санкции, соопштија неименувани европски дипломати. Според нив, процесот допрва започнува и е во рана фаза.
„Министерствата за надворешни работи и Европската комисија работат на тоа. Предлозите најверојатно ќе бидат претставени на почетокот на летото“, рече еден од дипломатите, пренесува Комерсант, цитирајќи го ЕУ Обсервер.
Друг извор забележува дека составувањето на нов пакет санкции може да потрае подолго. Во моментов, овој потег на ЕУ изгледа повеќе шпекулативен, додаде тој. Истиот извор ја истакна и важноста од следење на процесот на мирно решавање на конфликтот во Украина.
Портпаролката на Европската комисија Анита Хипер на 13 март потврди дека европските земји размислуваат да ги продолжат санкциите против Русија и дека никој нема намера да ги ублажи. Сепак, за секоја одлука е потребна согласност од сите членки на ЕУ.
Последен пат ЕУ воведе санкции против Русија на 24 февруари, на третата годишнина од конфликтот, кои го опфаќаат банкарскиот сектор, металургијата и логистиката. И САД не планираат да ги укинат санкциите кон Русија, потврди американскиот државен секретар Марко Рубио.
Сепак, според информациите на Ројтерс, Вашингтон би можел да ја промени политиката на санкции доколку Москва се согласи на прекин на огнот.