Европа ја започнува новата грејна сезона со складишта на гас полни за повеќе од 82 проценти.
Тоа е повеќе од очекуваното и во моментов ги смирува пазарите, но аналитичарите предупредуваат дека вистинската отпорност на енергетскиот систем ќе биде тестирана дури во наредните месеци, особено ако зимата е студена. Складирањето гас во Европската Унија покрива околу една третина од зимската потрошувачка и е клучна заштита од скокови во побарувачката.
Иако цените остануваат значително пониски отколку во времето на енергетската криза во 2022 година, пазарот сè уште ги следи ризиците како што се построги санкции против Русија, прекини во снабдувањето или геополитички шокови, објавува Блумберг.
Ова лето, Европа успеа да привлече дополнителни пратки на течен природен гас благодарение на послабата побарувачка во Кина и падот на индустриската потрошувачка во регионот.
Според податоците од Гасната инфраструктура на Европа (GIE), од април до септември, складиран е за една третина повеќе гас отколку претходната година.
Достапните количини варираат во зависност од земјата-членка. Франција веќе надмина 90 проценти зафатеност, додека Германија заостанува, нејзиниот најголем објект во Реден има само 29 проценти зафатеност, под планираните 45 проценти, пишува Танјуг.
Прогнозите покажуваат дека Европската Унија би можела да ја заврши грејната сезона со околу 33 проценти капацитет за складирање, додека во случај на постудена зима, тоа ниво би можело да се намали на 22 проценти.
Глобалниот вишок на течен природен гас би можел да ја олесни ситуацијата, но ако зимата е посурова од просекот, ситуацијата ќе биде многу понапната, коментираше Саднан Али, аналитичар на банката HSBC.