Акционерите на „Фолксваген“ повторно го критикуваа корпоративното управување на компанијата, барајќи поголема независност на одборот и изразувајќи растечка загриженост поради менаџерската доминација на две моќни семејства.
На виртуелното годишно општо собрание, неколку големи инвеститори го критикуваа фактот дека извршниот директор на „Фолксваген“, Оливер Блуме, истовремено е и шеф на „Фолксваген“ и на „Порше АГ“. Ова прашање е предмет на спор уште откако Порше беше котирана на берзата како посебна компанија во септември 2022 година, потсетува Ројтерс.
„Господине Блуме, уште еднаш сериозно ве повикуваме: откажете се од една од вашите позиции во одборите на директори“, рече Инго Шпеих од Дека Инвестмент, нагласувајќи дека конфликтот на интереси на врвот на компанијата е „исклучително проблематичен“ и предизвикува „голема штета на угледот и огромни финансиски загуби“.
Цената на акциите на „Фолксваген“ падна за речиси 25 проценти во текот на изминатата година – од 140,4 на 105,6 евра – што е под европскиот автомобилски индекс и германскиот DAX, според податоците на LSEG.
Компанијата се соочува со предизвици на сите клучни пазари, соочувајќи се со високи царини во САД, жестока конкуренција во Кина и високи трошоци за водење бизнис во Европа. Минатиот месец, „Фолксваген“ предупреди дека годишната маржа на профит веројатно ќе остане на долната граница од планираниот опсег.