Siemens ќе инвестира повеќе од 220 милиони долари во изградба на фабрика за возови во Северна Каролина, објавија Белата куќа и германскиот гигант.
Администрацијата на американскиот претседател Џо Бајден и неговите демократи насочуваат милијарди од федералниот буџет за модернизирање на старата инфраструктура и зголемување на производството во САД, надевајќи се дека ќе ги стимулираат трошоците на приватниот сектор и ќе создадат нови работни места, толкува Ројтерс.
500 нови работни места
Фабриката за возови Сименс ќе биде изградена во Лексингтон, град со 20.000 жители и ќе отвори 500 нови работни места до 2028 година, објави компанијата.
„Администрацијата презеде јасна посветеност да инвестира во инфраструктурата и да го трансформира секторот за мобилност кон позелени извори на енергија“, рече извршниот директор на Siemens AG Роланд Буш во телефонско интервју.
Сименс изгради „силна“ позиција на американскиот пазар и гледа можности за долгорочен раст во сегментот на брзата железница, додаде Буш.
Меѓу клиентите на германската компанија во САД се Amtrak и десетици транспортни компании, кои ќе бидат подобни за федерални стимулации за локомотиви со почист погон.
