Германските бизнисмени очекуваат длабока рецесија

32

Германската економија ја очекуваат тешки времиња, покажа најважниот показател за економскиот раст, индексот на деловната клима на минхенскиот економски институт Ifo.

Расположението на германските претприемачи значително се влоши во јули, а перцепцијата за деловната клима падна за 3,6 поени во однос на претходниот месец, на 88,6, што е најниско од јуни 2020 година, објави институтот.
Експертите очекуваа пад, но во просек очекуваа тој да запре на 90,1 поен.

„Германија е на работ на рецесија. Високите цени на енергијата и недостигот на гас ја оптоваруваат економската состојба“, ги коментира резултатите од истражувањето, претседателот на Ifo Клеменс Фист, пишува агенцијата „ДПА“.

Расположението на претприемачите се влоши во сите стопански гранки и тоа беше видливо. Во индустријата, песимизмот е највисок од врвот на пандемијата во април 2020 година.

„Тој тренд се провлекува низ речиси сите стопански гранки“, рече Фист, додавајќи дека расположението повторно се промени во сродните индустрии по неодамнешниот голем оптимизам, како и во туризмот и угостителството.

Германската економија во моментов е притисната од неколку проблеми. Најсериозни се веројатно ризикот од гасна криза, проблемите со испораката во надворешната трговија и високата инфлација. Заедно со тоа доаѓаат и високите каматни стапки на пазарот на капитал, кои ја зголемуваат цената на кредитите за компаниите и потрошувачите и со тоа ги задушуваат инвестициите и личната потрошувачка.

Минатата недела Европската централна банка ја зголеми референтната каматна стапка во еврозоната за прв пат по 11 години. Многу други централни банки во светот почнаа да ги зголемуваат каматните стапки уште порано.

Економистите од Commerzbank наведуваат дека германската економија веќе е во пад, и дека пред се зависи од рускиот претседател Владимир Путин колку на крајот ќе биде тешка ситуацијата.

„Доколку има целосен прекин на испораката на гас, длабока рецесија е неизбежна“, сметаат економистите.