Поради потоплиот почеток на зимата, Европа ќе ја дочека пролетта со поголема понуда на гас од претходно очекуваното. Ова ќе биде олеснување за Европа, која се бори со невидена енергетска криза, се вели во извештајот на Goldman Sachs.
Се претпоставува дека европските резерви на гас ќе бидат исполнети до речиси 30 отсто од нивниот капацитет на крајот на март. Претходно се претпоставуваше дека овој процент ќе биде помал, од 21 на 23 отсто, соопшти вчера Goldman Sachs.
„Ова ќе и овозможи на Европа полесно да ги надополнува залихите за следната зима во текот на летото“, додаваат тие.
„Летово ќе треба да се надополнат залихите. Ќе биде предизвик повторно да се пополнат со капацитет од најмалку 90 отсто, поради што намалувањето на побарувачката ќе биде уште поитно“, стои во анализата.
Goldman Sachs претходно процени дека цената на гасот за мегават час следното лето ќе биде 180 евра. Според новите проценки, таа сума е за 55 евра помала од претходно. Исклучително топлото време во северозападна Европа, кое трае од крајот на октомври, ги намали цените на горивото побрзо од очекуваното, забележуваат од Goldman Sachs.
Европа се бори со недостиг на гориво откако Русија го прекина протокот на гас преку гасоводите поради европската поддршка за Украина. Па, иако Европа успеа да обезбеди снабдување со гас за оваа година, следната година ќе биде многу потешко без руски гас. Особено ако Кина влезе во равенката.
