Милијардерот Илон Маск откри дека преку неговата компанија за вештачка интелигенција, xAI, активно работи на нова платформа наречена „Грокопедија“ (Grokipedia), чија цел е да претставува конкуренција на Википедија.
Маск, кој исто така е сопственик на социјалната мрежа Икс, тврди дека новата услуга ќе претставува „масовно подобрување“ во споредба со онлајн енциклопедијата чија содржина е уредувана од волонтери.
Тој константно ја обвинува Википедија за политичка наклонетост и левичарски ставови. Името на новата платформа е инспирирано од чат-ботот „Grok“ на xAI, кој Маск го опишува како „максимално ориентиран кон вистината“.
Сепак, „Грок“ предизвика полемики поради антисемитски забелешки, кои компанијата на Маск ги објасни како резултат на „грешки во програмирањето“.
Оваа најава доаѓа по критиките на Дејвид Сакс, сојузник на Маск и неодамна назначен комесар за вештачка интелигенција во администрацијата на американскиот претседател Доналд Трамп, кој предупреди за користење на материјали од Википедија за обука на системи за вештачка интелигенција.