Холандија одлучи да ги следи стапките на Шпанија и да се повлече од Повелбата за заштита на инвестициите во енергетскиот сектор, соопшти во средата Министерството за енергетика.
Повелбата е на сила од 1998 година и има повеќе од 50 потписници, вклучително и ЕУ, и им овозможува на инвеститорите да ги тужат владите за мерки кои ја намалуваат нивната заработка.
Во последниве години, повелбата ја користеа компаниите за фосилни горива и обновливи извори на енергија за да ги тужат владите поради регулаторните промени.
Така, во 2013 година, унгарската енергетска групација МОЛ поведе арбитражен спор против Хрватска, тврдејќи дека не ги почитувала своите обврски од деловниот договор за гас. Меѓународниот центар за решавање на инвестициски спорови (ICSID) донесе одлука против Хрватска во јули.
Во постапката, Загреб ја оспоруваше надлежноста на ICSID да одлучува за прекршување на Договорот за енергетска повелба, тврдејќи дека тоа е спротивно на правото на ЕУ, но арбитрите не го прифатија тој аргумент.
Објавувајќи ја одлуката за повлекување во средата, холандскиот министер за клима и енергија, Роб Јетен, му рече на парламентот дека договорот не е во согласност со Парискиот климатски договор и дека напорите за негово повторно преговарање не вродиле со плод, рече портпаролката.
„Затоа Холандија, по можност со целата ЕУ, ќе го напушти ЕКТ“, нагласи таа, додавајќи дека точниот датум на повлекување сè уште не е утврден.
Италија се повлече од договорот во 2016 година, а Хрватска, ЕУ и Шпанија се на списокот на земји и организации кои ја ратификувале повелбата или привремено ја применуваат, се наведува на веб-страницата на Договорот за енергетска повелба.
