Неколку минути пред полноќ, во Собранието на РСМ, Трајко Славески е именуван за гувернер на Народната банка на Република Северна Македонија. Славески, ќе го преземе кормилото во Народната банка од Анита Ангелоска-Бежовска која успешно раководеше изминативе седум години.
Трајко Славески е познат на јавноста и по неговото претходно искуство како министер за финансии во владата предводена од Никола Груевски. Во рамки на неговото политичко дејствување, важеше за еден од водечките економски умови на ВМРО-ДПМНЕ. Последните години ја извршуваше функцијата претседател на Советот на Град Скопје.
Со назначувањето на функцијата гувернер, согласно законските одредби, Славески ќе треба целосно да се дистанцира од партиските активности. Законот за Народната банка бара од гувернерот и вицегувернерите за време на мандатот да ја одржуваат институционалната неутралност и да се воздржат од политичко ангажирање.
Кој е Славески?
Роден е во Охрид во 1960 година. Посетувал редовни студии на Економскиот факултет при Универзитетот “Св. Кирил и Методиј” во Скопје, а на пост-дипломски студии бил на Калифорнискиот државен Универзитет во Чико, САД (1986/87) и на Универзитетот Харвард (1989/90). Дипломирал на Економскиот факултет во Скопје во 1983 година, а магистрирал и докторирал на истиот факултет во 1988 и 1997 година, соодветно. Во неговите полиња на професионален интерес спаѓаат: микроекономија и макроекономија; политичка економија на транзицијата и приватизацијата; бизнисот и владата (државата); економските и социјалните функции на државата; економика на работната сила; економика на корупцијата и организираниот криминал.