Фото: Pixabay
Лојалноста се стекнува и се негува со чесна работа, добри услови и понуди, коректност, професионалност и излегување во пресрет на специфичните потреби на клиентите.
“Јаготка на шлагот” се разните награди, коишто треба да ја потврдат лојалноста и да бидат причина повеќе некој да биде верен на вашата компанија и во иднина.
Предностите на лојалните клиенти се очигледни, а истите се рефлектираат во долгорочниот профит.
И покрај оправданоста на ваквиот пристап кон купувачот, треба да се обрне внимание на одредени потенцијални грешки при креирање на награда за верност.
Сите потрошувачи немаат иста вредност за бизнисот, па според тоа треба да ја прилагодите целокупната стратегија за развој на односите, како и системот на награди, што значи не треба да има иста награда за потрошувачи со различна вредност.
Создадената додадена вредност за потрошувачите мора да ги надмине трошоците за креирање на истата. Не може да се даде нешто за ништо, профитот често може да биде нереален, но трошоците се секогаш присутни.
Често може да се воведат награди што не се потребни со надеж дека потрошувачите ќе се однесуваат на ист начин и кога би ги немало поволностите. Системот на награди мора да влијае на однесувањето на купувачите, односно наградите мораат да придонесат за зголемување на лојалноста, за поголем профит привлекување на нови клиенти, а не да бидат само фрлање пари без ефект.
Долгорочната перспектива за развојот на односите со клиентите мора да има свој израз и во наградите. Еднократните промоции и краткорочните програми, како и програмите кои постојано се менуваат не се добар начин да се задржи потрошувачот. Ако ја наградуваме верноста тоа треба да биде врз основа на однесувањето во подолг временски период, а не да се базира на тоа колку некој потрошил во еден ден или колку производи биле купени.
Внимавајте на лажната лојалност – некогаш потрошувачите купуваат само затоа што немаат избор, односно нема друг производ што одговара, или затоа што моменталната цена е пониска во однос на конкуренцијата. Во овие случаи, промената на состојбата можно е да има негативни ефекти врз бизнисот, од причина што поголемиот број на клиенти ќе си заминат.
