Грција воведува построги сообраќајни казни, а новиот закон воведува ригорозни мерки за возење под дејство на алкохол и непрописно паркирање. Нацрт-законот веќе е презентиран во грчкиот парламент, а усвојувањето се очекува во наредните недели.
Целта е да се намали бројот на несреќи и да се зголеми безбедноста на патиштата.
Според новиот Закон за сообраќај, возачите фатени во пијана состојба се соочуваат со високи казни, одземање на возачката дозвола, па дури и затворска казна. Мерките се применуваат во зависност од количината на алкохол во крвта или издишаниот воздух.
Прво ниво – 0,50–0,80 g/l во крв – казна од 150 евра и одземање на возачката дозвола во траење од 20 дена;
Второ ниво – 0,80–1,10 g/l – казна од 700 евра и одземање на возачката дозвола во траење од 90 дена и,
Трето ниво – над 1,10 g/l – казна од 1.200 евра, затворска казна од минимум два месеци, забрана за возење во траење од 180 дена, одземање на регистарски таблички во траење од 10 дена до 6 месеци и задолжително одземање на возилото.
За повторен прекршок во рок од една година, возачот се казнува со парична казна од 1.000 евра и забрана за возење до 180 дена, додека во случај на над 1,10 g/l, казната се зголемува на 2.000 евра и забрана до две години. Доколку возачот го повтори прекршокот по трет пат во рок од пет години, возачката дозвола се одзема за седум години.
Затворска казна за блокирање на шини и нова контролна зона
Се воведуваат особено строги мерки за оние кои паркираат возила на начин што го блокира железничкиот сообраќај. Доколку возилото го спречи движењето на возовите или трамваите, предвидена е затворска казна од една до пет години, со образложение дека таквото однесување директно ги загрозува животите на луѓето.
Во Атина, блокирањето на трамвај сега носи двојна казна – 150 евра наместо претходните 75, со дополнително одземање на дозволата за 60 дена. Казните се зголемуваат и за паркирање на тротоари, во кружни текови и пешачки зони – од 100 на 350 евра, со забрана за возење во траење од 70 дена.
Нови ограничувања на брзината и построги правила за двотркални возила
Брзината на поминување покрај училишта и градинки се намалува од 30 на 20 км/ч. На малите улици, дозволената брзина ќе биде 30 км/ч, во градско возење 50 км/ч, додека на автопатите ограничувањето се зголемува на 140 км/ч, пишува Б92.
Употребата на заштитна кацига е задолжителна за сите корисници на двотркални возила – мотоцикли, велосипеди и електрични скутери. Ќе се воведат построги контроли за користење мобилни телефони при возење, како и за поминување на црвено светло.
Грчката влада вели дека сите мерки се воведени со цел намалување на бројот на несреќи и зголемување на колективната безбедност на патиштата. Новиот закон стапува на сила по неговото усвојување од страна на парламентот, а на возачите им се препорачува максимална претпазливост и почитување на прописите.