Кина почна спор со САД во Светската трговска организација поради дискриминаторските субвенции за производство на електрични автомобили, објави во вторникот кинескиот комитет при СТО.
Кина покрена постапка пред СТО поради субвенциите во американскиот Закон за намалување на инфлацијата, што, според Хина, резултираше со исклучување на нивните стоки од американскиот пазар, како и оние од другите членки на таа организација.
„Под превезот на одговор на климатските промени, намалување на емисиите на јаглерод и заштита на животната средина, овие субвенции всушност се условени со купување и користење на стоки од САД, односно увоз од одредени региони“, објави кинескиот одбор.
Кинеското Министерство за трговија го повикува Вашингтон „веднаш да ги коригира дискриминаторските индустриски политики и да ја зачува стабилноста на глобалните индустриски и синџири за снабдување со нови енергетски возила“, рече портпаролката на Министерството во Пекинг.
Претставник на СТО потврди дека го добиле барањето на Кина за консултации на оваа тема, без да даде детали.
Канцеларијата на американското Министерство за трговија, сепак, не одговори веднаш на барањето на Ројтерс за коментар за потегот на Кина.
По жалба, СТО формира панел за решавање на спорот и обично донесува одлука за шест месеци, а честопати одзема повеќе време.
Доколку СТО пресуди во корист на Кина, Вашингтон може да поднесе жалба и да го искористи правниот вакуум што постои од декември 2019 година поради противењето на Вашингтон на назначувањето судии во главната жалбена комисија на СТО.
САД бараат реформа на тоа тело, тврдејќи дека ги надминува своите овластувања, а започнати се преговори кои наидуваат на бројни пречки, забележува Ројтерс.
